ДЮРДЬОВ – Внєдзелю, 17. марца, у парохиялним доме грекокатолїцкей церкви Рождества Пресвятей Богородици у Дюрдьове, новозволани Церковни одбор (ЦО) отримал трецу порядну схадзку.
На нєй бешедоване о ярнїм ушорйованю желєнїдла на порти и теметове, та уж шлїдуюцого викенду будзе роботна акция садзеня жимжелєних древкох и винїманє старих. Док оцеплї жени зоз ЦО посадза квеце до жардинєрох и на други места у порти. Предклади за ушорйованє порти на схадзки предложела и приказала Неда Саламун зоз Дюрдьова пейзажни архитекта котрей ушоренє дюрдьовскей порти була дипломска робота. У вельким тижню будзе попораєне на теметове, та ше поволую шицки котри жадаю помогнуц. Вецей информациї мож достац при членох Церковного одбора.
На схадзки бешедоване и о пораєню нукашньосци церкви, поставяню ґарадичох за ковруш и мрамору на коврушу. Роботи би требали буц закончени по Вельку ноц. Парох Михаил Холошняй членох ЦО поинформовал же Општина Жабель розписала конкурс за помоц вирским заєднїцом. Порадзене же би ше средства поглєдовали за правенє закрица на каплїчки на теметове.
На схадзки було вельо бешеди о грекокатолїцким манастиру у Рускей улїчки. У нїм вецей децениї нє иснує дїялносц Шестрох Служебнїцох до котрих дакеди барз любели одходзиц велї ґенерациї дзецох. Понеже манастир на предай и припада нашим чесним шестром, члени ЦО вєдно з о. Михаилом Холошняйом нашому владичеству упутели писмену молбу у котрей виражели свойо думанє, потреби, идеї и толкованє прецо Дюрдьовчанє маю потребу за порушованє дїялносцох Шестрох Служебнїцох у манастире.