БЕОҐРАД – Беоґрадски вирни парохиї Кирила и Методия всоботу ше зишли на Богослуженє односно на кирбайску Службу Божу зоз котру того року починаю означовац свой ювилей – 90-рочнїцу од снованя парохиї.
Кирбайску Службу Божу, попри домашнього пароха о. Владислава Варґи, сослужел и дон Александар Ковачевич, ґенерални викар беоґрадскей надбискупиї и парох церкви Христа Царя. Апостол читал богослов Ярослав Варґа, а коцурски паноцец Данил Задрепко наказовал на трох язикох.
На концу ше вирним приключел и повинчовал ювилей и Кирбай надбискуп и митрополит Станислав Хочевар. Вон наглашел вельку улогу нашей Церкви у беоґрадскей метрополи, єй екуменску димензию котру вона приноши у своїм шведоченю и присутносци у общей Католїцкей Церкви.
После многолїтствия присутни ше дружели на своїм традицийним аґапеу.