ПЕТРОВЦИ – На 42. „Петровским дзвонє” любителє рускей култури, литератури и музики всоботу, 6. юния, у Петровцох мали нагоду присуствовац отвераню вистави роботох младих подобових творительох – Лариси Гнатко, Роберта Ерделя и Кристияна Медєша. Виставу поставел и отворел Владимир Провчи, котри през розгварку з авторами представел їх творчосц и роботу. У голу Дому култури була поставена вистава фотоґрафийох з роботи КУД „Яким Гарди”, з нагоди 65-рочнїци його снованя.
Видавательство Союзу Русинох РГ кажди рок на „Петровским дзвонє” представя виданя хтори обявело прешлим року, та тераз представени двокнїжка Меланиї Пап и Звонимира Барни „Дом у шерцу”, „Душа як гушля” Владимира Провчия, алманах „Думки з Дунаю”, шейсц числа часопису „Нова думка” и штири числа часопису за дзеци „Венчик”.
На Литературно-музичним вечаре руских поетох з Горватскей свою поетску творчосц на „Петровским дзвонє” всоботу представели Ганча Папандриш Гаргаї, Звонимир Барна, Мелания Пап (єй писнї читала Любица Гаргай), Ксения Лїкар, Владимир Провчи, Агнетка Балатинац и Любица Гаргай.
Литературно-музични вечар бул пошвецени означованю 85 рокох народзеня Силву Ерделя, 85 рокох народзеня Владимира Костелника, 85 рокох народзеня Йозафата Колбаса и 65-рочнїци КУД „Яким Гарди” з Петровцох, так же реферати о тих ювилейох пречитали – Владимир Дудаш о роботи КУД „Яким Гарди”, Любица Гаргай о Силвови Ердельови и Йозафатови Колбасови, та Агнетка Балатинац о Владимирови Костелникови. Поезию Силву Ерделя и Йозафата Колбаса рецитовал Томислав Рац.
У музичней часци наступела Хлопска шпивацка ґрупа домашнього КУД и шпиваче Ансамблу „Кичера” зоз Снїни, зоз Словацкей. Конферансу водзела Мануела Дудаш а вечар анимировали Любица Гаргай и Агнетка Балатинац.
