ОПШТИНА ШИД – На швето Богоявленє вчера, 19. януара у греркокатолїцких церквох у општини Шид после богослуженьох по традициї пошвецена Богоявленска вода.
У церкви Преображеня Господнього у Шидзе Службу Божу служел, а потим и пошвецел воду парох о. Михайло Режак, а вирни потим налївали воду до судзинох и ношели до своїх обисцох.
У церкви Собору святого архангела Михаила у Беркасове и церкви успеня Пресвятей Богородици у Бикичу Служби Божо служел и воду пошвецел парох о. Владимир Еделински Миколка.
Тиж на швето служена Служба Божа и у Церкви святого апостола и евангелисти Луки у Бачинцох, служел и пошвецел воду парох о. Юлиян Рац.
О. Еделински пошвеца и обисца вирних у Беркасове и Бикичу, о. Рац у Бачинцох, а од нєшка, 20. януара о. Режак почал зоз пошвецяньом обисцох вирних у Шидзе.
