НОВИ САД – На Сайме кнїжкох на штанду Секретарияту за образованє, предписаня, управу и национални меншини АП Войводини пияток, 20. марца свойо виданя представели Новинско-видавательна установа Руске слово и Завод за културу войводянских Руснацох.
Нови наслови з видавательней продукциї Заводу за културу войводянских Руснацох представeл директор тей институциї мaст. Саша Сабадош, хтори бешедовал о кнїжки Вично тирва 13. май, авторох Любу Раца и Олени Папуґа, як и авторки найновших публикацийох – Каталоґ предметох Музейней збирки Руски Керестур Любица Отич и совиданю з Новинарску асоцияцию Руснацох (НАР) Руски идиоми, фрази и вирази Ирина Гарди Ковачевич.
О виданьох НВУ Руске слово бешедовали авторка найновшей сликовнїци за дзеци Заграда Даниела Тамаш чийо стихи илустровала Александра Русковски, рецензентка виданьох НВУ Руске слово Ирина Гарди Ковачевич, редакторка Видавательней дїялносци Ясмина Дюранїн и директор Установи др Борис Варґа, хтори надпомнул же пошвидко з друку видзе и 100. нова руска кнїжка у виданю Руского слова за остатнї осем роки одкеди почало реформованє видавательного оддзеєня нашей Установи, цо вшелїяк резултат за паметанє.
Дружтво за руски язик, литературу и културу свойо виданя представи нєшка, 21. марца од 12 до 13 годзин у рамикох Координацийного одбору за язики, литературу и културу на штанду Секретарияту за образованє, предписаня, управу и национални меншини.
Медзинародни Саям кнїжкох будзе отримани од 17. по 23. марец на Новосадским сайме. У його рамикох, будзе отримана и Вистава уметносци Арт Експо, як и 20. Медзинародни саям образованя Драгокази хтотри будзе тирвац од 19. по 21. марец.
Уход на шицки спомнути саямски манифестациї ше нє наплацує. Саям за нащивительох будзе отворени од 10 по 20 годзин, окрем остатнї дзень, пондзелок, 23. марца кед роботни час будзе по 16 годзин
