Цо то шицко рошнє и пребува у чудесним швеце загради, яки ше там случую сплєтки, алє и бриґи и радосци, манифестациї и святочносци одгадує нам Даниела Тамаш през едукативни и забавни писньочки у своєй новей кнїжки за дзеци „Заграда”, хтору богато илустровала Александра Русковски, а хтору концом марца видала НВУ „Руске слово” як 19. кнїжку у едициї „Заградка”.
РС Як сце пришли на идею же би тема вашей новей дзецинскей кнїжки була праве заграда?
Даниела Тамаш: Кед зме ше догваряли о новей кнїжки, директор „Руского слова” Борис Варґа ми предложел даскельо теми, а медзи нїма була и заграда. Тота тема ше ми найбаржей попачела, бо є едукативна, животна, а тиж так будзи виглєдовацки и авантуристични дух, бо швет загради наисце чудесни.
РС Прецо думаце же важне же би дзеци учели о чудесним швеце загради?
Даниела: Прето же можу научиц вельо о рошлїнох, инсектох и дробних животинькох хтори там жию. Заграда ше през рок нєпреривно меня и кед ше припатраю на тоти пременки, дзеци можу вельо научиц о рочних часцох и хвилї. Найвецей о чудесним швеце загради дзеци науча кед войду до того швета, припатраю ше, ослухую, пахаю, коштую желєняву и овоци, и бешедую о тим зоз свою фамелию. Цо найважнєйше, дзеци у загради можу научиц вельо роботи як цо то копанє, грабанє, пресадзованє, упознац заградарски орудия, як ше их хаснує, и здобуц велї схопносци.
РС Цо сце чули, яки ше то сплєтки случую у загради?
Даниела: Боме, вшелїяки сплєтки, бо там жиє вшелїяка желєнява, а и вона, як и людзе, ма рижни прикмети. Зна буц скромна, ганьблїва, любопитлїва, любоморна, а дараз и звадлїва. Чула сом же цибулю огваряли, паприґа папрички дошпинтовала, кромпля ма якуш тайну, а гращок и пасуля у звади.
РС Кед бисце були даєдна желєнява зоз „Загради”, хтора би то була?
Даниела: Горка паприґа – вецейфарбова, єдноставна, природна, здрава и полна енерґиї. Можебуц звонка випатра змирено, алє знука є богата, всестрана и ма моцни характер.
РС У загради, а и ширше, бешедує ше и о тим же вишла ваша нова кнїжка. Яки ви чули коментари од читачох?
Даниела: Чула сом же ше читачом барз пача илустрациї и же ше даєдни мали читаче хтори ещи нє научели читац, любопитлїво питаю своїм родичох же би им читали. Наздавам ше же ше тота кнїжка попачи велїм дзецом и же ю дзечнє буду читац.
РС Попри кнїжкох за одроснутих, приручнїкох и универзитетских учебнїкох, обявени вам и кнїжки за дзеци „Страшидла, нє зашмеюйце ме!” и „Ремесла и професиї”, а вашо писньочки нашли ше и у сликовнїцох „Фарби” и „Родзини”. Яка будзе шлїдуюца тема вашей кнїжки за дзеци и чи уж робице на нєй?
Даниела: Кед будзе за тото условия, то вироятно будзе предлуженє кнїжки од пред даскельома роками „Страшидла, нє зашмеюйце ме”. Плануєм написац и дацо за одроснутих, алє о тим-потим, час укаже.
РС А цо робице кед нє пишеце?
Даниела: Робим як координатор Дньового пребуваня за особи з аутизмом и як професор на Катедри за специялну едукацию и регабилитацию Медицинского факултета у Новим Садзе. Кед нє робим, пишем и обявюєм науково роботи, робим рижни проєкти и тримам семинари фаховцом. Шлєбодни час препровадзуєм зоз фамелию и товаришами. Окреме уживам у мальованю, прето же так можем виражиц свойо импресиї, думки и емоциї. Любим нащивйовац театри и биоскопи, бо ме ґлумецка уметносц инспирує и збогацує, аж сом и сама ґлумела у вецей театралних представох. Воженє на бициґли, алпинизем и рекреативне бежанє, то мой способ же бим остала активна и повязана зоз природу, цо ми окреме важне.
ХТО ПОМОГНУЛ ДРУКОВАНЄ СЛИКОВНЇЦИ
Друкованє сликовнїци „Заграда” финансийно помогли (по азбучним шоре): Балатинац Агнетка, Ковач Атила, Медєши Любомир, Мудри Мария и Михайло, Олеяр Славомир, Феирбанкс Новак Амалия.
ДЗЕ МОЖ КУПИЦ „ЗАГРАДУ”
Тоту нову едукативну сликовнїцу мож купиц за 700 динари (на знїженю 490 дин) у представительствох НВУ „Руске слово” у Новим Садзе и у Руским Керестуре, як и прейґ колпортерох по наших местох. Тиж так, мож ю наручиц и прейґ сайту knjizkiporuski.com