ВЕРБАС/КОЦУР – По дояви гражданох активисти Еколоґийного руху Вербас на шлайсу у Коцуре замерковали масовне загинуце риби, углавним шуля.
Еколоґийни рух Вербас сообщел же на поверхносци води обачене вельо капитални прикладнїки риби медзи 5 и 10 кили як су преврацени на хрибет. Наводза же спричинєна велька еколоґийна алє и економска чкода рибовому фонду. А же причина такей катастрофи запущеносц каналу и же ше то случело прето же нєт досц оксиґену у води. У каналу єст вельо трави, шицко погоршали и горучави, а нєт анї пущаня швижей води зоз горнього цеку канала, з напряму Савиного Села.
Еколоґийни рух Вербас о тим обвисцел Покраїнску водну инспекцию и Покраїнску инспекцию за защиту животного стредку, и вимагани виход на терен, же би ше вжало прикладнїки води и превжало мири за злєпшанє стану у каналу.
Зоз Еколоґийного руху Вербас гваря же после прияви замерковане, як им доявела Рибочуварска служба, же почало випущованє швижей води до каналу, а кошачки предлужели скланяц веґетацию.
Загинуце риби зазначене и у рики Тиси при Сенти и Бечею.