ВЕРБАС – Як ше случовало нєдавно и на других часцох канала Дунай-Тиса-Дунай, вчера, 6. юлия и на вербаским Шлайзу гражданє обачели загинуце велького количества риби.
На терен такой вишли члени руху Желєни Вербас, и по сообщеню, загинута риба була у базену ладьовей преводнїци. Причина тому найвироятнєйше бул нєдостаток оксиґену у тей часци пре претаргнуте доцеканє швижей води зоз горнього цеку каналу. Долня капура преводнїци погубена, и през отвор ту прицекла заґадзена вода зоз долнього цеку Велького бачкого каналу и спричинєла загинуце риби.
Загинуло даскельо стотки килограми углавним шулю, чуки, деверики и златици.
Желєни Вербас поднєсол прияву Водовей инспекциї, як и налог за чисценє пре розпадованє загинутей риби и ширенє зараженя. Як сообщене, тот обєкт длуго запущени и препада, та вимагане и оправянє капури на преводнїци.
По остатнїх информацийох, водови инспектор швидко реаґовал на прияву и наложел позарядове инспекцийне надпатранє.