КОЦУР – У просторийох Явней библиотеки „Данило Киш” – Оддзелєню у Коцуре пияток вечар, 10. юлия, отримана друга провадзаца програма першого дня тогорочней Културней манифестациї „Коцурска жатва” и стретнуца младих – промоция Википедиї на руским язику.
Присутних зоз пригоднима словами привитала библиотекарка Тат`яна Колєсар, а потим слово превжал проф. др Михайло Фейса.
О тим як функционує найвекша интернет енциклопедия на швеце – Википедия, як ше ушорює и публикує статї и котрих правилох ше потребне притримовац бешедовали сотруднїци рускей Википедиї Светлана Папуґа и Ирина Олеяр зоз Руского Керестура. Тиж, визначени и рижни проблеми зоз котрима ше зочую у своєй роботи, а дискутоване и о можлївих ришеньох.
През отриману явну презентацию волонтерки ше намагали и анимирац Коцурцох и других же би ше уключели до писаня за Википедию и ширеню знаня на руским язику.
Промоцию Википедиї на руским язику у рамикох коцурскей Културней манифестациї потримал и Национални совит рускей националней меншини.
