ШВАЙЦАРСКА – У рамикох проєкту Интеркултурална образовна черанка штверо школяре Школи Петро Кузмяк, од 1. по 15. септембер, пребували у Швайцаркскей, у Дзецинским валалє Песталоци, при месце Троґен.
З Войводини на черанки були вкупно 40 школяре, попри Керестурцох и зоз Бачкей Паланки, Бачкого Петровцу, Руми и Индїї, хторих провадзели шесцеро координаторе. Зоз керестурскей школи були тройо школяре першей класи ґимназиї руского оддзелєня – Матия Чапко, Анамария Сопка, Надя Горняк, як и Николина Величкович, хтора школярка 7. класи основней школи, а провадзела их наставнїца Тереза Катона. У другим тижню школяром зоз Сербиї ше придружели и їх парняки зоз Швайцарскей, та вєдно з нїма обрабяли теми дзецинских правох, розличносци, дискриминациї, толеранциї.
През практични задатки и рижни креативни роботнї, школяре розвивали комуникацию, сотруднїцтво и схопносци ришованя рижних проблемох.
Викенди були резервовани за упознаванє Швайцарскей, та школяре нащивели Луцерн, Цирих, Сент Ґален, Райново водопади, наукови парк Технораму, як и Апенцел, дзе ше упознали зоз локалну традицию и културу, як и верх Хохер Кастен зоз хторого ше пресцера погляд на алспки пейзаж.
