Початок штирирочного мандату вшелїяк же представя час кед ше муши аналитично спатриц предходни период дїлованя НВУ „Руске слово”. Шицки аспекти роботи, од правних по технїчни, мушели би буц поскладани як дроти
у колєсу хторе ше нєпреривно обраца
Скорей уж бешедоване цо поробене у предходним, а велї зоз запланованих роботох буду предлужени и у наступним периодзе. Маме позакончовац роботи на ушореню новей хижи у Руским Керестуре, наздаваме ше лєпшому сотруднїцтву зоз читачами у других местох, едуковац ше и технолоґийно усовершовац.
Гоч скорей шицко добре виплановане, у тей хвильки реални условия таки же наша Установа на конкурсох нє достала средства за друкованє даскелїх нових кнїжкох зоз Видавательного плану, нє достати средства за реновиранє маґазинского простору, канцеларийох и архиви у Дописовательстве у Руским Керестуре, санированє чкоди од вилїву води у роботних просторийох у Новим Садзе ище вше нє започате, а забрана Инспекцийней служби же би ше хасновало одредзени просториї и далєй задава бриґи у орґанизациї роботи. То уж три пукнути дроти…
План и програма роботи зоз хтору кажди заинтересовани кандидат конкурує на Явну оглашку за вибор директора НВУ „Руске слово” треба же би представяла визию кадзи тота Установа ма исц. Тота визия, пред тим як цо ше ступи на длужносц, так повесц, то драга по хторей треба исц. Тото цо ше наисце случує, то побочни ствари и обставини на хтори ше з часом наиходзи. През драгу ше ище даєден дроцик у колєсу зламе, алє даєден ше и оправи. Дакеди зоз власнима моцами, а дакеди без помоци других нє мож. Но, алє драга длугока штири роки, а улога директора довесц Установу по циль.
Кед би ше дїлованє Установи наисце поровнало зоз гонєньом бициґли, вец би требало повесц же єст даскельо важни предусловия за безпечну драгу. То вшелїяк же хто корманює, зоз чого направени сиц на хторим шедзи и як обраца педали. Чи швидко, чи лєм тельо же би ше колєса обрацали, чи помали, алє осторожно. А важне и тото цо ше случує през драгу: кед круциш – дай занятим знац же меняш напрям, и вони муша знац кадзи драга водзи; кед цма – уключ шветла; кед ци дацо стої на драже – забренкай и заобидз; кед гужва – закоч и причекай док ци ше нє отвори драга…
Часи у хторих нєшка жиєме турбулентни. Алє наша Установа уж ма вецей як 80 роки и мож повесц же прешла през вшелїяки периоди, а анї єден нє бул лєгки. То видно и зоз кнїжки „Модус операнди: руковадзаци рускословци особнє” хтора видзе по конєц рока, автора Любомира Медєша. На самим початку кнїжки автор цитира познатого филозофа Сенеку хтори гвари же: Тоти, схопни на векшу пресию, вони можу ублажиц нєвигодни часи, цесне место прешириц и чежке з места премесциц. Дзекуюци нашим предходнїком, насампредз нашим колеґом хтори зазначели з якима ше спокусами у роботи зочовали и як вони мушели швидко, лєбо помали обрацац педали, наисце интересантне пречитац. И праве тото треба визначиц – барз важне кельо ше як поєдинєц трудзиш и теди кед ци ше видзи же чежко идзе, бо обставини у роботи нїґда нє були лєгки, а кажди час приношел нови файти спокусох.
НВУ „Руске слово” ма свойо место у нашей дружтвеней заєднїци. Нє лєм пре информативну, културолоґийну, лєбо улогу повязану зоз очуваньом нашого руского идентитету и традициї, алє то часто пренєшене и на новинарох хтори зоз своїм професийним одношеньом ґу роботи, будую и ширшу заєднїцу хтора учи буц обєктивна, алє и свидома своїх правох и потреби вихасновац их. Ту, насампредз, думам на потребу вияшнїц ше як Руснак/Рускиня, бо ше зоз того поєдинєчного акту як каричка у ланцу вяжу велї други права хтори можеме витвориц як бенефит за цалу заєднїцу.
Ми, як Установа, у професийним, кадровим, технїчним и каждим другим смислу порихтани жиц у складзе зоз тим цо нам час приноши. Анї нам нє будзе, як цо анї нашим колеґом нє було лєгко, алє одвичательносц охабиц Установу нашим нашлїднїком хтори буду пестовац тоту нїтку ище голєм тельо. Нам остава гонїц по нашей драги и наздавац ше же нє будзе вше дирґаца, алє же длугши час будземе гонїц по ровним, до проста.