НОВИ САД – Предвиберанкови сход лїстини Александар Вучич – Зєдинєна Сербия отримани вчера, 16. октобра у центре города. Присуствовало вельке число прихильнїкох Сербскей напредней странки. На сходзе бешедовали Александар Вучич и премиєр Словацкей Роберт Фицо, хтори бешедовал по сербски.
Вучич зоз Беоґраду сцигол на гайзибану до Петроварадину, а вец ше прешейтал пешо до Нового Саду. по бешедовал о нєщесцу на гайзибанскей станїци, у хторим настрадали 16 особи и гварел же муши присц до стварней правди, а нє политичней и же ту нє шме буц попущованя. Тиж гварел и же нарок будзе закончена перша часц Ошмиху Войводини же ше и надалєй буду будовац драги, а здравствени центри буду збудовани, обновени лєбо реконструовани.
Премиєр Словацкей Роберт Фицо гварел же потримує Вучича прето же є лидер хтори нєзогина хрибет, та пре интерес своєй жеми зна повесц нє, тиж му и подзековал на тим же ше стара о Словацох у Сербиї.
До городу од рана, у провадзеню полициї, сцигли колони тракторох, хтори були паркирани на Булевару Михайла Пупина при будинку Покраїнскей влади, прецо транспорт у тей часци центра, перше бул спомалшени, а од поладня и застановени. До городу сцигли людзе на велїх автобусох зоз рижних местох зоз цалей Сербиї. Опрез Сербского народного театра на Улїци краля Александра и на Булевару Михайла Пупина були штанди зоз рижнима єдлами. У даєдних новосадских школох настава була скрацена. Сход закончени зоз огньометом.
