НОВИ САД – На Трецей програми радия Радио-телевизиї Войводини на програми по руски ютре, 18. октобра, на 7 годзин рано годно послухац Емисию за валал, а на 12:30 годзин емисия Културна панорама.
На нєдзелю у найновшим виданю Емисиї за валал медзи иншим, будзе слова о тим же оптимални рок за шатву тирва, медзитим ище ше чувствує пошлїдки високих температурох яки були того лєта и длугоки период без дижджу. И попри тим же пред даскельoма днями падал диждж, жем и далєй суха. Рок ше помали приблїжує ґу концу, а парасти сумирую урожай и правя план за шлїдуюцу сезону. Ознова ше врацаю култури хтори дакус занєдзбани як цо продукция бундавох. Нє буду вихабени анї найновши висти зоз польопривреди, проґноза хвилї за наиходзаци тидзень, як и цени польопривредних продуктох на новосадских пияцох. Емисию пририхтую Єлена Дудаш, Златко Колєсар, Михаил Рамач.
Емисия за валал на програми кажду нєдзелю на 7 годзин рано на УКТ габох радия РТВ на 92, 100 и 107,1 мгг.
Потим, на 12:30 годзин у найновшей емисиї Културна панорама годно послухац о Лєтней школи руского язика, котра отримана у Попрадзе и о Подобовей колониї котра отримана у Новим Садзе. Тиж, будзе слова и о пририхтованьох за наиходзаци 23. Фестивал жридлового шпиваня Най ше нє забудзе у Дюрдьове.
Емисию Културна панорама ше емитує кажду нєдзелю на 12:30 годзин, а мож ю послухац на УКТ габох радия РТВ на 92, 100 и 107,1 мгг, и на одложеним слуханю на сайту Радио-телевизиї Войводини.
