РУСКИ КЕРЕСТУР – У голу Основней и штреднєй школи „Петро Кузмяк” у Руским Керестуре вчера отримани крачунски и новорочни вашар, з мотом „Помогнї ти, та помогню и тебе”. На вашаре школяре предавали пригодни винчованки, а приход подарую до парохийного Каритасу за загрожени фамелиї, за наиходзаци швета.
З тей нагоди була и мала програма хтору пририхтали школяре першей класи руского оддзелєня Ґимназиї зоз свою професорку Наталию Будински, котри були и иницияторе тей подїї. Вони з провадзеньом на ґитарох одшпивали два крачунски коляди, а на програми бул и Дїдо Мраз.
До тей гуманей акциї були уключени скоро шицки школяре керестурскей Школи. Крачунски винчованки вирабяли школяре нїзших класох ОШ зоз своїма учительками, а на вашар пришли и дзепоєдни їх родичи. Школяре пиятей и шестей класи ОШ, з наставнїками, з пригоднима прикрасками пририхтали виложени панои.
На концу вашару шицким присутним подзелєни мали дарунки – бомбона з виписаним красним жаданьом, цо пририхтали школяре седмих и осмих класох ОШ и руски оддзелєня Ґимназиї, а на Вашаре присуствовали и други штредньошколци.
Тоту гуману инициятиву потримала директорка Школи Хелена Пашо Павлович, а реализовали ю и наставнїци Славка Гайдук и Златица Малацко.
