РУСКИ КЕРЕСТУР – Руски Керестур од соботи, 2. априла, ма ище єден спортски терен за бавенє, у часци на самим концу Русинскей улїци, спрам Косанчичу, направени на инициятиву гражданох котри жию у тей часци валалу.
Терен на пажици опрез обисцох, вєдно зоз своїма приятелями и роботнїками з фирми „Клуб 10”, направел єй власнїк Мирко Надь, як гварел, насампредз пре безпечне бавенє коло 20-ерих дзецох, понеже є далєй од калдерми.
Спортски терен за фодбал и други спорти димензийох 20 зоз 40 метери (як рукометни терен у Старей школи). После кошеня трави поставени капури, хтори закопани и забетоновани до жеми, а терен аж и означени по предписаньох, односно описани з вапном.
Циви за капури обезпечело ЯКП „Руском”, пошвайзовал их Вуядин Щекич, а у означованю терену допомогол ФК „Русин”.