ШИД – На швето Преображениє Господнє вчера, 19. авґуста, церква и вирни зоз Архиєрейску Службу Божу, хтору предводзел преосвящени владика кир Георгий Джуждар, а сослужели ище седемцме паноцове, преславели 216. по шоре Кирбай.
У казанї преосвящени владика визначел значносц того швета и Христового преображеня на гори Тавор и додал же ше и вирни муша преображиц у своїх шерцох и шлїдзиц Христову драгу.
Домашнї парох о. Михайло Режак подзековал владикови, паноцом, шестром Василиянком и Служебнїцом и вирним же возвелїчали Кирбай и источасно их поволал же би 1. септембра у Шидзе означели 100 роки иснованя шестрох Василиянкох.
На концу Служби Божей по традициї, владика и священїки пошвецели овоц, а вец одшпиване Многолїствиє.
И того року була богата и вашарска часц Кирбаю по хторим є у Шидзе тиж препознатлїви.