РУСКИ КЕРЕСТУР – У своєй першей нащиви нашей парохиї нови Апостолски нунций архиєпископ Санто Ґандєми и секретар Апостолскей нунциятури Симон Санчез 10. априла пришли опатриц место зоз котрого до нунциятури на службу пошли три шестри Служебнїци СНДМ. Домашнї им бул наш епарх кир Георгий Джуджар.
То перша нащива нового Апостолского нунция Керестуру, алє ше наздаваме же их будзе вецей. З тей нагоди нащивели нашу Катедралну церкву св. Оца Миколая, Манастир малих шестрох на Циґлашоре, Манастир шестрох Служебнїцох з каплїцу Успения Пресвятей Богородици, и нашо святилїще Водицу.
Апостолска нунциятура у Беоґраду то ватиканска амбасада, а нунций представнїк папи Франциска у Сербиї. На служби у нунциятури три нашо шестри СНДМ: ш. Михаїла Воротняк, ш. Мария Пеликх и ш. Викентия Фурдь. Апостолски нунций сцел видзиц одкадз шестри, дзе жию, дзе їх провинциялна хижа.
Но, то нє була єдина причина його приходу. Нунций и його секретар упознали и малу шестру Мартину котра им обяшнєла исторят єй чину у Керестуре. Ище пред тим Апостолски нунций наручел од малей шестри Мартини же би намальовала криж до їх каплїци у нунциятури. З оглядом же часц роботи уж поробена, пришли опатриц єй роботу и нунцийови ше барз пачи. То Криж од малей шестри од Исуса за апостолску нунциятуру у Беоґрадзе.
Мала шестра Мартина визначела же за тоту икону вибрала окремне древо котре ше нє може зогнуц. Скорей як почала з роботу, требало пририхтац древо и премасциц го зоз дзевец пасмами клию и порихтац за писанє. Шестра Мартина позлацовала и древорез у чим єй помагал Сашо Колбас зоз Бачкей Тополї.
Нєсподзиване и приємне стретнуце зоз апостослким нунцийом и його секретаром ище баржей допринєсла атмосфера Вельконоцних шветох.
