КОЦУР – Члени Мото-клубу „Пеґасус” зоз Коцура, у сотруднїцтве зоз Туристичну орґанизацию општини Вербас и численима спонзорами, и того року орґанизовали „Дїдомразияду” у центру валала. Друженє зоз моторкашами пооблєканима до Дїдох Мразох отримане на площи опрез Дома култури вчера, 28. децембра.
З нагоди наиходзацих новорочних и крачунских шветох наймладшим подзелєни лакотки, а ошвиженє було порихтане и за старших. Пах цеплого чаю и вареного вина виполньовал центер и околни улїчки, а друженє прикрашела и пригодна музика.
Богати етно столи вредних членїцох коцурских здруженьох Активу женох КУД „Жатва” и КУД „Завичайне врело” зоз рижнима найсмачнєйшима колачами, сланима питами и сладкима рейтешами нє заобишли анї тоту „Дїдомразияду”, а члени Ловарского дружтва „Сокол” за нащивительох порихтали швиже упечени колбаси зоз дзивинового меса.
У центру Коцура були поставени и даскельо столїки дзе викладаче представели свойо понукнуца, домашню палєнку рижних смакох, рижни прикраски, а ту бул и пастор Евангелскей церкви Александар Суботин котри тиж порихтал нащивительом дарунки.
Моторкаше у червених шапочкох наймладшим подзелєли дари, а дзецински шмих виполнєл центер валала. На єдней часци площи наймладши, алє и старши, ше могли висликовац зоз Дїдом Мразом у його червеней фотелї.
И того року орґанизаторе були окреме задовольни зоз одволаньом нащивительох. Окрем Мото-клубу „Пеґасус” и Туристичней орґанизациї општини Вербас, орґанизованє подїї помогли и Општина Вербас, Месна заєднїца Коцур, Основна школа „Братство єдинство”, Етно клуб „Одняте од забуца”, КУД „Жатва”, КУД „Завичайне врело”, Дом култури, Ловарске дружтво „Сокол” и Александар Суботин.
