Чежке стретнуце за фодбалерох зоз Дюрдьова

автор л. вереш
212 Опатрене

ДЮРДЬОВ – У 10. колу Подручней фодбалскей лиґи Нови Сад, хторе одбавене 16. октобра, фодбалере ФК Бачка 1923 зоз Дюрдьова страцели у стретнуцу зоз фодбалерами Фрушкогорского партизана зоз Буковцу, резултат 1:2 (0:0).

У першим полчаше обидва екипи ше максимално закладали за кажду лабду на шицких часцох терена. И домашнї и госци мали даскельо раз нагоду посцигнуц ґол, алє ю нє вихасновали и до другого полчасу вошли без посцигнутих ґолох.

У другим полчаше фодбалере Бачки бавели лєпше и удало им ше посцигнуц ґол у 51. минути. Госци свой перши ґол посцигли у 60. минути, а нєодлуга потим и свой други ґол у 69. минути.

Вельке число жовтих картонох на стретнуцу, штири за домашнїх и штири за фодбалерох зоз Буковцу, алє и єден червени картон, указую же на терену нє було спортского справованя.

После того кола Бачка спадла на штварте месце зоз двацец єдним бодом.

У шлїдуюцим колу дюрдьовских фодбалерох чека стретнуце зоз першопласованим ТСК Темерин.

ПОВЯЗАНИ ТЕКСТИ