НАДАЛЬ – Фодбалски клуб Искра зоз Коцура всоботу, 2. марца одбавел перше першенствене стретнуце у другей часци полусезони ПФЛ Суботица, зоз екипиу Напредак у Надалю.
Коцурцом ше и попри указаного доброго бависка, нє поспишело зазначиц побиду и уписац нови три боди на початку другей часци першенства.
На соботовим стретнуцу ФК Искра мала улогу фаворита, указала надмоц на терену, медзитим щесце було на боку домашнїх. Бавело ше на половки домашнїх, дзе екипа Искри нєпреривно грожела на ґол фодбалером Напредку. Домашнї ше цалком поцагли на свою половку терена, и ридко кеди преходзели на половку екипи зоз Коцура.
Зоз константним претаргованьом бависка и затримованьом, екипа Напредку нє дошлєбодзовала Искровим бавячом же би мали чечне бависко и направели озбильнєйши нагоди. У таким бависку домашня екипа зоз єдного шлєбодного копнуца дава ґол у 20. минуту, дзе после нєпорозуменя Искровей охрани, екипа Напредку почала водзиц зоз 1:0.
Искра швидко одвитує на ґол домашнїх, та так у 28. минуту, найлєпши стрилєц ПФЛ Суботица, Янкович дава ґол и вировнує резултат на 1:1. После того ґолу Искрово бавяче направели даскельо добри нагоди, медзитим резултат ше нє менял. То бул и резултат першого полчасу.
На початку другого полчасу, Искров тренер Вукадинович до бависка уводзи двох искусних бавячох, Бодонїя и Надя, же би направели ище векши прицисок на ґол Напредку.
ФК Искра доходзи и до другого ґола на стретнуцу, медзитим вон понїщени после подозривей ситуациї, на вельке нєзадовольство як бавячох так и публики зоз Коцура. До конца стретнуца Искра остала и з бавячом менєй, понеже Надь достал червени картон, а стретнуце закончене зоз резултатом 1:1. Екипа Искри указала добре бависко у Надалю, медзитим резултат виостал.
Искра бавела у составе – Мирослав Ступар, Марко Секулич, Лазар Милованович, Зоран Сердар, Мариян Малацко (Борис Бодонї), Драґан Комазец (Ненад Надь), Дамир Мачиженски, Милян Дюрдєвац, Дамян Ґубаш, Миливой Ґаджич и Данило Янкович
Идуце першенствене стретнуце Искра бави на домашнїм терену у Коцуре зоз екипу АФК зоз Ади. Фодбалере Искри буду мац нагоду врациц ше на побиднїцку драгу и предлужиц зоз зарисованим цильом, а то висши ранґ змаганя.
Стретнуце ше бави на нєдзелю 10. марца, на 14:30 годзин у Коцуре.