РУСКИ КЕРЕСТУР – Toгорочни 57. Драмски мемориял Петра Ризнича Дядї почина на соботу, 22. марца, и будзе тирвац по пияток, 11. априла. Як сообщели орґанизаторе зоз Дома култури Руски Керестур, пре технїчни причини подїї на Мемориялу хтори перше були наявени за пияток, 21. марца, буду отримани о тидзень, на пияток 28. марца.
Понеже Будовательна инспекция нєдавно пре безпечносц заварла векшу часц будинку керестурского Дома култури за хаснованє, шицки представи за старших на тогорочним Мемориялу буду виведзени у Културним центре у Кули, док два дзецински представи буду одбавени у Школи „Петро Кузмяк”. Локация провадзацих програмох у Руским Керестуре будзе благочасово обявена.
Уход на Мемориял ше того року нє будзе наплацовац.
На соботу, 22. марца, на 20 годзин у Културним центре у Кули будзе премиєрно виведзена представа Ивана Франка „Будка число 27ˮ, у режиї Владимира Надя, хтору одбавя члени Драмского студия „АРТˮ Дома култури Руски Керестур.
У Културним центру у Кули, на стреду, 26. марца, на 18 годзин, будзе виведзена и представа „Петро Панˮ по тексту шкотского писателя Джеймса Метюа Бария, у режиї Ребеки Планчак и Мирослава Малацки, хтору виведзе дзецинска секция Драмского студия „Артˮ.
На пияток, 28. марца у Руским Керестуре будзе отримана промоция ЦД-а „Генцаре” Владимира Малацка.
Вечар ювилантох на Мемориялу чий госц будзе длугорочни ґлумец-аматер Любомир Дудаш Инґе з нагоди 70 рокох од його народзеня, будзе отримани на соботу, 29. марца.
За нєдзелю, 30. марца, на 20 годзин у Културним центру у Кули заказана представа РНТ „Петро Ризнич Дядя” „Полицає” Славомира Мрожека, у режиї Янка Лендєра.
Кед слово о дзецинских представох, вони буду одбавени у Школи „Петро Кузмяк”, та на пияток, 4. априла, на 12 годзин РКУД „Др Гавриїл Костельник” з Кули виведзе представу „Важне писмо” по тексту Михала Ковача, а у режиї Нади Лендєр з Вербасу. Тогорочни Мемориял будзе закончени зоз представу „Инсталуй и ти дїдов дж пи ти (GPT)ˮ РНТ „Петро Ризнич Дядя”, по тексту Ирини Гарди Ковачевич и Славка Ороса, а виведзена будзе на пияток, 11. априла, тиж у Школи „Петро Кузмяк” на 12 годзин.