РУСКИ КЕРЕСТУР – У тижню пред нами на репертоаре на 57. Драмским мемориялу Петра Ризнича Дядї будзе ище єдна представа за одроснутих, представа за дзеци, як и музична промоция и ювилантски вечар.
На ютре, пияток 28. марца на 20 годзин у Виронаучней сали у порти Церкви св. о. Миколая, будзе отримана промоция ЦД „Генцаре” Владимира Малацка.
Шлїдуюцого дня, на соботу 29. марца, на 20 годзин, заплановани Вечар ювилантох кед госц будзе Любомир Дудаш Инґе, з нагоди 70 роки од його народзеня. Ювилей ше означи у Хорскей сали у Доме култури, а у рамикох того вечара будзе и вистава костимох КОЦ АП „Бранислав Нушич” зоз Шиду.
На нєдзелю, 30. марца на 20 годзин у Културним центру у Кули наступи РНТ „Петро Ризнич Дядя” зоз представу за одроснутих „Полицає” Славомира Мрожека, у режиї Янка Лендєра зоз Вербасу.
Дзецински представи буду одбавени у Школи „Петро Кузмяк”, так на пияток 4. априла на 12 годзин Руске културно-уметнїцке дружтво „Др Гавриїл Костельник” з Кули виведзе представу „Важне писмо” по тексту Михала Ковача у режиї Нади Лендєр з Вербасу.
На пияток 11. априла тиж у Школи „Петро Кузмяк” на 12 годзин тогорочни Драмски мемориял ше закончи зоз представу „Инсталуй и ти дїдов джи пи ти (GPT)ˮ Руского народного театру „Петро Ризнич Дядя”, по тексту Ирини Гарди Ковачевич и Славка Ороса.