Дзень Руснацох означени у Новим Садзе

автор А. Паланчанин
412 Опатрене

НОВИ САД – У Руским културним центре (РКЦ) у Новим Саду, 17. януара шветочнo означене Националне швето Руснацох у Сербиї.

Хор Грекокатолїцкей церкви св. апостолох Петра и Павла и Руского културного центра „Гармония” одшпивал гимну „Боже правди” и шветочну шпиванку „Браца Русини”, а присутних привитали помоцнїк городоначалнїка Нового Саду, Александар Петрович, хтори медзи иншим надпомнул же Руснаци на тих просторох вецей як 270 роки. У прешлосци городу и Републики Сербиї вони мали вельку улогу. За скоро три столїтия соживота зоз векшинским сербским народом, як и зоз другима меншинскима народами зоз своїм скарбом збогацели каждодньовосц и дали окремни и препознатлїви печац тим простором.

Присутних на преслави привитал и предсидатель Управного одбору РКЦ Славко Винаї. У своєй бешеди вон здогаднул на часи кед 17. януара 1751. року подписани перши контракт о насельованю Руснацох на тоти простори. Од теди по нєшка вельо того витворене, а часточнє то видно и на шветочносци. Руски културни центер, надпомнул Винаї, место дзе ше сходза нє лєм Руснаци, алє шицки добри людзе, од наймладших по найстарших. Вредни аматере роками на числених манифестацийох призначую красни успихи.

У своєй привитней бешеди предсидатель Вивершного одбору Националного совиту Руснацох Желько Ковач, надпомнул же Совит у своєй роботи унапрямени на штири обласци хтори дефиновани зоз предписанями – образованє, културу, информованє и службене хаснованє язика и писма. Праве ту, як надпомнул, ступень витворених правох очиглядни – през активносци и успихи Центра.

У пригодней програми з тей нагоди Хор „Гармония” одшпивал ище даскельо шпиванки, а Антония Сабадош одрецитовала писню „Яка ши красна оцовщино наша”, а Серґей Дюранїн пречитал два писнї „Жимска ноц” и „Любим жем свою”.

На концу шветочносц прикрашел и наступ Мирослава Папа зоз Рутен треш оркестру, вони одграли штири композициї.

ПОВЯЗАНИ ТЕКСТИ