РУСКИ КЕРЕСТУР – У орґанизациї Пакт Рутенорум, гуманитарни Турнир у одбойки на писку 3 на 3 (Beach Volleyball) на базену у Руским Керестуре, хтори почал стреду, 5. авґуста, закончени пияток, 7. авґуста зоз финалним стретнуцом медзи екипами Буковача зоз Руского Керестура и Шмецелинґ зоз Бачкого Ґрачцу.
На тогорочним турниру участвовали 15 екипи, а попри екипи зоз Лалитю и прешлорочного шампиона, екипи зоз Бачкого Ґрачцу, тринац екипи були зоз Руского Керестура.
У стретнуцу за 3. место бавели:
Vamos a la playa – Милениялци – 16:14; 7:15; 11:8.
Финалне стретнуце бавели:
Шмецелинґ – Буковача – 15:12; 15:10.
Конєчни пласман турнира у одбойки на писку 3 на 3 (Beach Volleyball) шлїдуюци:
перше место завжала екипа Шмецелинґ зоз Бачкого Ґрачцу,
друге место припадло екипи Буковача зоз Руского Керестура,
треце место освоєла екипа Vamos a la playa тиж зоз Руского Керестура.
За найлєпшу бавячку на турниру преглашена Мила Обрадович зоз побиднїцкей екипи, док за найлєпшого бавяча преглашени Деян Надь Кичо зоз вицешампионскей екипи.
И тогорочни турнир у одбойки на писку 3 на 3 у Руским Керестуре бул гуманитарного характера, а бавел ше за Стефана Шафарика зоз Кули.
Орґанизатор турнира у одбойки на писку 3 на 3 (Beach Volleyball) Здруженє Пакт Рутенорум (Pact Ruthenorum).
