КОЦУР – Фодбалски клуб Искра зоз Коцура внєдзелю, 10. марца пред вельочислену домашню публику у Коцуре одбавела друге першенствене стретнуце ПФЛ Суботица. Екипа Искри дочекала тото стретнуце у добрим розположеню же би процив екипи АФК зоз Ади уписала нови три боди и же би ше врацела на побиднїцку драгу.
Як лидер на таблїчки, ФК Искра зоз Коцура на нєдзельовим стретнуцу мала улогу фаворита, медзитим то мушела указац и на терену, цo ше им и поспишело, понеже стретнуце закончене зоз побиду домашнїх зоз резултатом 3:1.
Искрово бавяче бавели, векшу часц стретнуца на процивнїкей половки, медзитим госцуюци бавяче ше од початку орґанизовано бранєли зоз дзешец бавячами. Так после велїх нагодох хтори Искра направела, у 36. минути Малацко на добре додаванє з лївого боку доходзи до пейц метерох и трафя до ґолманового кута за 1:0.
Кед ше шицки наздавали же Искра руши ище моцнєйше и же пошвидко да и други ґол, случує ше идентична ситуация як и на першим стретнуцу у Надалю прешлого тижня, кед госци зоз єдного копнуца вировнали резултат на 1:1. Зоз тим резултатом ше закончел перши полчас.
У другим полчасу подобна ситуация як и у першим, фодбалере Искри селя бависко на половку госцох зоз Ади и там ше бави векшина стретнуца.
Домашнї бавяче направени вельо нагоди, алє ладба нїяк нє сцела до ґолу. На други ґол домашнїх чекало ше аж по 70. минут, кед после єдного претаргнуца зоз правого боку, на добре центарбице Сердара, Дамян Ґубаш зоз главу преруцує ґолмана и дава ґол за 2:1 за Искру.
После того ґолу, госцуюци бавяче „спадли” у бависку и нєодлуга фодбалере Искри доходза и до трецого ґолу. После корнеру хтори тиж виведол Сердар, лабда прелєцує на другу стативу на хторей ше находзи Дамян Ґубаш, хтори зоз своїм другим ґолом з главу, звекшує резултат на 3:1 за домашнїх и вельке радованє бавячох. То бул и конєчни резултат стретнуца.
Искра наступела у составе – Филип Хромиш, Марко Секулич, Зоран Сердар, Мариян Малацко (Павле Човс), Дамир Мачиженски, Борис Бодонї (Дьордє Байчич), Милян Дюрдєвац, Дамян Ґубаш, Давид Неделькович (Миливой Ґаджич), Дамян Михняк (Лазар Милованович) и Данило Янкович (Драґан Комазец).
Идуце першенствене стретнуце ФК Искра бави зоз ФК Ударник у Вишнєвцу, а понеже ше стретню перша и треца екипа на таблїчки, будзе то дерби кола. Стретнуце ше бави на нєдзелю 17. марца, на 14:30 годзин.
