РУСКИ КЕРЕСТУР – Иван Чапко, з Руского Керестура, внєдзелю, 28. мая, одбавел остатнє 38. коло у шветово познатим фодбалским змаганю „Fantasy premier leagueˮ, после хторого ше нашол на першим месце и у Сербиї и на Балкану, а на тринастим у швеце, од вкупно 11,5 милиони змагательох.
Слово о онлайн фодбалским бависку у хторим кажди змагатель на хаснованє достава буджет од 100 милиони виртуалного пенєжу, и на основи власного преценьованя як фодбалере анґлийскей лиґи одбавя у стварним бависку, „купуєˮ бавячох и так составя свою фиктивну премиєр-лиґашску екипу. Зоз тимом хтори себе кажди учашнїк формує, змага ше процив других любительох фодбалу зоз цалого швета.
Чапко од вкупно 38 колох, уж после 12. бул медзи 10 найлєпшима бавячами на швеце и од теди по конєц отримовал сам верх таблїчки зоз меншима осцилациями.
Пред двома тижнями, у 36. колу, мал ситуацию кед требал вибрац єдного спомедзи двох бавячох у нападу, но понеже Чапкова одлука спадла на погришного, вимкли му 30 боди и сиґурне перше место, односно перша награда – седмодньове пребуванє у Анґлиї и одход на їх два фодбалски стретнуца.