КОЦУР – У Грекокатолїцкей церкви Успения Пресвятей Богородици у Коцуре вчера, 28. авґуста, преславене храмове швето – Кирбай. Традицийно у тим валалє тото швето означую и грекокатолїцка и православна церква.
Святочна Служба Божа з нагоди швета Успениє Пресвятей Богородици у грекокатолїцкей церкви почала на 10 годзин, а возвелїчал ю владика кир Георгий Джуджар и числени священїки котри того дня були присутни.
Церковни хор под руководством Александра Планкоша зоз шпивом возвелїчал святочносц кирбайскей Служби Божей. У процесиї коло церкви по законченю служби участвовали шицки парохиянє, зоз читаньом Евангелиї на шицких штирох бокох швета, а по каждим читаню священїки пошвецали церкву и присутних.
Кирбай у валалє и того року провадзели богата вашарска часц и вельки забавни парк. Велї валалчанє, як и їх госци, родзина и приятелє з околних местох по цеплей и слунечней хвилї ше шпацирали през центер валала. Числени столїки зоз рижнима кирбайскима лакотками, бависками, квецом, рижнима прикрасками були поставени по улїчкох у центру валала, а за наймладших у школским дворе були ринґишпили, гомбалки, авточка… Валалски кафичи робели зоз звекшаним капацитетом и понукали музику за шицки смаки, у котрих ше госци и домашнї забавяли до позних годзинох.
