КОЦУР – У дворе Основней школи „Братство єдинство” у Коцуре вчера пополадню члени Добродзечного огньогасного дружтва Коцур орґанизовали красне друженє и розвагу за наймладших.
По словох командира Дружтва Саши Тодича, циль тей ткв. пена парти, окрем друженя, бул и тот же би огньогасци приблїжели свойо активносци младежи и дзецом, у наздаваню же док вирошню постаню їх члени.
З тей нагоди пририхтани и приказани були и вежби, та присутни могли видзиц и наймладших пионирох Дружтва як гаша огень зоз брентачами и зоз процивогньовима апаратами. Окрем того, приказана була и ситуация гашеня огня на моторней превозки, як и резанє авта, котру демонстровали сениоре, а участвовал и подросток Дружтва.
У орґанизациї того друженя участвовали, окрем членох коцурского Дружтва, и члени Добродзечних огньогасних дружтвох зоз Савиного Села, Вербасу и Бачкого Доброго Поля, а числени спонзоре обезпечели соки и ошвиженє за шицких присутних.
Нєдзельове пополаднє було идеалне за розвагу у пени з оглядом на прави лєтни горучави котри ище вше тирваю, а ошмихи и пена на дзецинских тварох були найлєпши знак же пена парти Добродзечного огньогасного дружтва Коцур була успишна.
