КУЛА – Општини Кули буду видзелєни средства од 1.200.000 динари за пораєнє шмециска у Руским Керестуре, за цо нєдавно подписани Контракт.
Министерка защити животного штредку, Сара Павков, подписала нєдавно Контракти зоз представнїками вецей як 40 локалних самоуправох, на основу хторих, у тим року, буду вичисцени 288 дзиви депониї, у вецей як 40 локалних самоуправох у Сербиї, преноша општински медиї.
За исту наменку, односно за пораєнє шмециска у Керестуре, општина Кула достанє 1.200.000 динари од хторих Министерство обезбечи 960.000 динари, а Општина Кула 240.000 динари, та контракт спред Општини Кула подписала помоцнїца предсидателя Општини, Єлена Павков.