БЕОҐРАД – На Ґалениковим медийским конкурсу, хтори того року бул на тему: „Превенция: Отримуюца визия здравя”, участвовала и дописователька НВУ „Руске слово” Лидия Вереш зоз Дюрдьова.
На конкурсу компаниї Ґаленика зоз Беоґраду Верешова участвовала зоз текстом: „Точна дияґноза найважнєйша”, хтори обявени у новинки „Руске слово” у рубрики Людзе, роки, живот – Нашо дохторе. Текст на конкурс Верешова послала у ориґиналней форми написани по руски.
Жири, у составе мр др Ненад Буразор, мр пх. Єлена Стояновски и Бранислав Чале, окреме похвалєли Верешову же конкуровала зоз текстом написаним на язику националних меншинох. Ище у обгрунтованю члени жирия визначели же текст високого квалитету и ориґинални, а младей новинарки подзековали на доприношеню у освидомйованю и промоциї важносци превенциї у здравству.
Конкурс бул розписани з нагоди Шветового дня здравя, и зоз тогорочну тему: „Превенция: Отримуюца визия здравя” компания Ґаленика жадала наглашиц окремносци у змоцньованю превенциї и очуваню здравя у нєшкайших обставинох кед здравє загрожене од рижних факторох. На конкурсу участвовали новинаре и медиї зоз цалей Сербиї.
