КОЦУР – На други дзень Крачуна, Собор Богородици и Обручнїка Осифа, а на шицких Службох Божих у Грекокатолїцкей церкви успения Пресвятей Богородици у Коцуре того дня було мированє.
На 10 годзин почала Архиєрейска Служба Божа, та Крачун з вирнима у Коцуре преславел и наш владика кир Георгий Джуджар. Сослужели парох рускокерестурски о. Владислав Варґа, о. Михайло Шанта и домашнї парох коцурски о. Владислав Рац.
Владика Джуджар повинчовал шицким присутним швето Рождества Христового, визначел його вельку значносц, и як гварел, най радосц того швета ошвицує наш жемски живот.
З тей нагоди о. Рац подзековал кир Георгийови Джуджарови, як и другим священїком же пришли возвелїчац тото швето у коцурскей парохиї. Тиж, того дня о. Михайло Шанта означел 11 роки як є пошвецени на священїка, и шицки му повинчовали, подзековали на його служеню и пожадали най би Господ Бог благословел його служенє.
