ФС ВОЙВОДИНИ – На нєдзелю, 5. марца, у Подручних фодбалских лиґох Зомбор и Суботица починаю першенствени стретнуца.
ФК „Искра” у Подручней фодбалскей лиґи Суботица на початку ярнєй часци сезони у Савиним Селу будзе бавиц дерби стретнуце зоз домашнїм ФК „Будучносц” котри ше зоз шицкима моцами бори остац у лиґи.
ФК „Искра” тото стретнуце дочекує як фаворит и треба надпомнуц же Искра єшеньску часц закончела на осмим месце, а Будучносц на 14. На таких стретнуцох, як по правилу, нєт фаворита, бо вельо того завиши и од мотивациї бавячох обидвох екипох, котри вельо раз одбавя и вецей як можу.
У першим колу у єшеньскей часци сезони Искра на домашнїм терену була прешвечлїва и зазначела побиду з резултатом 5:0, та ше любителє фодбалу у Коцуре наздаваю новей побиди.
ФК „Русин” у Подручней фодбалскей лиґи Зомбор на нєдзелю бави процив екипи ФК „Будучносц” зоз Ґложану. У єшеньскей часци стретнуце тих двох екипох мало нєришени резултат – 1:1. Анї з тей нагоди Русиновцом нє будзе лєгко гоч єшеньску часц першенства закончели на 2. месце, а екипа зоз Ґложану на 8.
Фодбалере дюрдьовского Фодбалского клубу ,,Бачка 1923” ище єден тидзень буду на одпочивку, бо їх першенствене змаганє у Подручней фодбалскей лиґи Нови Сад почнє 12. марца. У першим стретнуцу ярнєй часци першенства буду бавиц процив екипи ФК „Цемент” зоз Беочину.
У єшеньскей часци екипа Бачкей була лєпша у стретнуцу зоз Цементом, победзела зоз 1:0. Но яки резултат будзе у предстояцим стретнуцу чежко нагаднуц, бо Бачка у тей хвильки на пиятим месце на таблїчки, а Цемент на трецим.
У каждим поглядзе стретнуца и Искри и Русина буду напарти и вериме интересантни за навиячох.