НОВИ САД – На Шветови дзень городох, 31. октобра, Город Нови Сад приступел до УНЕСКО Мрежи креативних городох швета и з тим постал перши город у тей часци Европи у катеґориї нових и диґиталних уметносцох (Media Arts).
З оглядом на престижни титули Младежска престолнїца Европи, Европска престолнїца култури, награда „Мелина Меркури” и „Найлєпши тренд у култури”, Нови Сад ше нашол медзи городами як цо то Линц, Лион, Остин, Модена, Торонто и други, з чим потвердзел свою позицию як центер култури и иновацийох, преноши городски сайт.
Ище єдно шветове припознанє у обласци култури потвердзенє континуитету укладаня до вкупного розвою нашого Городу. Окреме кед слово о катеґориї хтора повязує науково-образовни установи зоз актерами зоз обласци култури даваюци Новому Саду єдну нову вредносц з чим город ровноправно провадзи сучасни шветово цеки, виявел городоначальнїк Милан Дюрич.
Викрок яки Нови Сад направел у нових и диґиталних уметносцох, у рамикох проєкта Европска престолнїца култури го и кандидовал за членство у тей престижней мрежи городох. Предлуженє програми Европска престолнїца култури и запровадзованє акцийох отримовного розвою у обласци култури, окреме у обласци медийней уметносци, була єдна од причинох за подношенє прияви.
Мрежа креативних городох Унеска (The UNESCO Creative City Network) формована 2004. року як би промововала сотруднїцтво медзи городами хтори препознали креативносц як стратеґийни фактор за отримовни урбани розвой. У тей мрежи тераз 350 городи и вєдно маю циль – положиц креативносц и културни индустриї до центру своїх розвойних планох на локалним уровню и активне сотруднїцтво на медзинародним уровню.