КОЦУР – Порядна 6. схадзка Одбору за културу Националного совиту Руснацох була отримана штварток 4. априла у Коцуре, єдна з найважнєйших точкох було розписованє Конкурсу за орґанизованє манифестацийох у обласци защити нєматериялного културного нашлїдства и уметнїцкей творчосци Руснацох у 2024. року котри розписани 5, а тирва по 20. април. Цалосну документацию, текст Конкурсу и прияву мож пренайсц на сайту НС Руснацох www.rusini.rs на початним боку на руским язику.
На конкурс мож конкуровац лєм за манифестациї котри у Репрезентативним календаре манифестацийох Руснацох, затераз на списку манифетацийох єст 17, алє як надпомнуте на схадзки, Календар мож дополнїц кед же єст даєдна манифестация котра сполнює предвидзени условия.
Надалєй, на схадзки начално утвердзени праве и Календар манифестацийох, зоз точнима або приблїжнима датумами отримованя. Кратка дискусия порушана пред конєц схадзки, о Фестивалу малих сценских формох „Дюра Папгаргаї”, насампредз о тим же чи сполнює основни критериюми. Заключене, же ше у тим року випровадзи шицки манифестациї, а же початком идуцого рока, док шицки поднєшу звити, Одбор направи схадзку на котрей ше будзе анализовац кажда поєдинєчно.
