РУСКИ КЕРЕСТУР – Наявйовани роботи на оправяню дражки и мурика за базеновим мосциком у Руским Керестуре почали концом прешлого тижня, а роботи окончує Явне подприємство „Води Войводиниˮ у рамикох проєкту ушорйованя и вимульованя Малого бачкого беґелю.
Роботи почали пияток, 21. юния, а по словох секретара Месней заєднїци Михайла Пашу, окончователє роботох наявели же адаптация будзе тирвац 10 роботнї днї.
Накадзи ше роботи закончи, наявює секретар Пашо, ознова ше пущи воду до беґелю, а такой будзе орґанизоване и длуго чекане вичисцованє базену и отверанє сезони купаня.
Понеже керестурски базен у надлежносци подприємства „Води Войводиниˮ, наглашує Пашо, кажду оправку и адаптацию муши окончиц тото подприємство, та гоч купаче нєсцерпезлїво чекаю же би роботи були закончени, Месна заєднїца ма право орґанизовац лєм вичисцованє базену, визначує секретар.
