НОВИ САД – Вельке число Новосадянох вишло на позарядово парламентарни виберанки такой по отвераню виберацких местох на 7 годзин, а на дзепоєдних локацийох, насампредз у централних часцох городу, шори ше формовали ище скорей швитаня.
Надзвичайно вельку виходносц у найвекшим городзе Покраїни потвердзую и перши урядово податки з Городскей виберанковей комисиї Нового Саду (ГВК), хтора сообщела же на городским подручу по 10 годзин гласало 21,31 одсто уписаних гласачох.
Гоч на виберацких местох наисце нєзапаметани ранши гужви, виберанкови процес потераз преходзи у достоїнственей атмосфери а у шоре за гласанє ше дополадня просеково чекало по годзину – годзину и пол. Зазначени даскельо интервенциї полициї хтора на терен виходзела по прияви гражданох на можлїви виберанково нєправилносци у околїску виберацких местох.
По предходно обявених податкох ГВК, Нови Сад ма 336.807 гласачох. Надпомнїме же прешлого тижня Министерство державней управи и локалней самоуправи сообщело же Нови Сад ма 345.932 гласачох, а приблїжни податки представела и Републична виберанкова комисия РВК (345.914). Як потолковане, розлика у чишлє гласачох у тим же РВК рахує и Новосадянох хтори ше приявели гласац индзей, док ГВК чишлї лєм тих цо гласаю на подручу Городу Нового Саду.
