БЕОҐРАД – Прешлого штвартку, 15. октобра, у просторийох Националного совиту ромскей националней меншини отримана схадзка Координациї националних совитох националних меншинох, на котрей потерашня предсидателька Координациї Сузана Куюнджич Остоїч спред Националного совиту Бунєвцох придала предсидательску длужносц потерашньому заменїкови Новицови Яношевичови зоз Националного совиту Влахох, а за заменїка вибрани Национални совит чарногорскей националней меншини котрому предсидатель Драґолюб Малович.
За заменїка, попри чарногорского Совиту, предложени бул и словацки Совит, медзитим за вибраного було 9 гласи, за словацки 4, и єден глас бул стримани.
Предшедуюци мандат Координациї националних совитох националних меншинох орочени на єден рок, и припада националному совиту, а нє особи. Потим предшедованє пребера национални совит котри кончел функцию заменїка, та ше на придаваню длужносци вше вибера лєм заменїка.
Спред Националного совиту рускей националней меншини на схадзки бул член Совиту проф. др Михайло Фейса котри потолковал о чим ше дискутовало после придаваня длужносци.
„Бешедоване о тим же пред Координацию националних совитох националних меншинох нєизвесни часи. Наявює ше зменшанє министерствох та нєизвесне чи Министерство за людски и меншински права и дружтвени диялоґ будзе затримане. Присутни думаю же єдно таке министерство, гоч и зоз пременєну назву, нєобходне. Национални совити маю даскельо значни предкладаня а єдно з нїх и предкладанє члена РЕМ-у. Националним совитом потребне координованє їх нaступа пред представителями Влади Републики Сербиї. Порадзене же би ше допис о тим составел и уручел предсидательки Народней скупштини у технїчним мандату Ани Брнабич. Же би то було покончене, єдногласно вибрани найискуснєйши ‒ представитель болгарскей националней меншини пан Стефан Стойков”, гварел др Фейса.
Фейса вихасновал нагоду и же би поставел питанє же прецо на двоїх виберанкох кед слово о збераню одн. даваню потримовкох одредзеним лїстином нє существує исти третман т.є. прецо меншини у иншаким, огранїчуюцим положеню. Кед на Републичних виберанкох мож давац потримовку вецей лїстином, прецо то нє мож и на Виберанкох за национални совити националних меншинох. На цо одвитоване же ше за Републични виберанки применює нови закон, а за Виберанки за национални совити важи закон о националних совитох зоз 2018. року, хтори нє меняни.
Шлїдуюца схадзка будзе заказана по законченю виберанкох за национални совити, по конституованю шицких националних совитох, та ше потим предлужи зоз роботу.