ШИД – Збор гражданох, студенти и штредньошколци орґанизовали протест з нагоди дня ошлєбодзеня Шиду всоботу, 6. децембра.
Протест потримали и студенти у блокади зоз вецей местох Сриму и других городох хтори пешо рушели до Шиду дзе сцигли у позних пополадньових ходзинох, а протестни сход отримани у главней Карадьордьовей улїци.
И на тим протесту винєшени вимоги за сполньованє студентских вимогох и насампредз же би були розписани позарядово парламентарни виберанки.
Отримани и 16 минути цихосциза жертви, хтори настрадали на Гайзибанскей станїци у Новим Садзе и минута цихосци за борцох хтори погинули у борбох за ошлєбодзенє Шиду у Другей шветовей войни.
Спрам слова орґанизатора протесту, були присутни коло 700 учашнїки и протест прешол без инцидентох.
Источасно кед ше отримовало протест, сход отримали и прихильнїки власци у центру городу при будинку Пошти дзе и шедзиско Општинского одбору Сербскей напредней странки, а у городзе були присутни значни полицийни моци у опреми за розбиванє демонстрацийох.
