БАЧ – Зонска смотра рецитаторох отримана всоботу, 29. марца у Велькей сали Народней библиотеки „Вук Караджич” на хторей у трох катеґорийох наступели вецей як 100 рецитаторе, а пласман за Покраїнску смотру виборели и пецеро рецитаторе зоз Руского Керестура – Олеґ Катона, Даниєла Рамач, Милена Рамач, Валентина Новта и Яна Варґа.
У младшим возросту змагали ше 42-йо рецитаторе, а од трох рецитаторох з Керестура, Олеґ Катона и Даниєла Рамач ше пласовали на Покраїнску смотру.
У штреднїм возросту, дзе участвовал 41 рецитатор, з Керестура ше змагала лєм Милена Рамач хтора и виборела пласман на висши супень змаганя.
У найстаршим, штредньошколским возросту, з Керестура участвовали три рецитаторки, а далєй ше пласовали Валентина Новта и Яна Варґа.
Рецитаторох у младшим возросту пририхтала Оленка Живкович, док у шреднїм и старшим Мирослав Малацко.
Покраїнска смотра рецитаторох будзе отримана 25, 26. и 27. априла у Сечню.
