КОЦУР – Внєдзелю, 28. мая у Коцуре госцовала екипа Дюрдїна, екипа котра на другим месце на таблїчки и котра до Коцура пришла освоїц нови три боди зоз котрима би направела вельки крочай ґу цилю, а то остац на другим месце и пласовац ше до баражу за Войводянску лиґу.
По цо пришли, госци зоз Дюрдїна тото и освоєли, алє вельо чежше як цо плановали. Бависко и борба на терену була цалком ровноправна, аж мож повесц же Искра була тота котра мала инциятиву, алє на тим стретнуцу нє мала розположеного бавяча котри би реализовал даєдну од даскелїх шансох. Публика на тим стретнуцу видзела лєм єден ґол, а тот ґол дали госци и то зоз своєй єдиней шанси.
Єден бавяч пребил по боку врацел лабду на 5 метери и центарфорови Дюрдїну нє було чежко вихасновац тоту шансу.
Од бавячох Искри найлєпшу шансу мал Бокан, котри тиж єдну врацену лабду з боку копнул коло самей стативи.
За Искру бавели: Новаков, Секулич, Л. Милованович, Човс, Сердар, Малацко, Бокан, Колошняи, Пердух, Драґоєвич (Латинкин), П. Мрдєнович (Лазетич)
Треба визначиц и барз подле судзенє судиї Ателєвича котри правел велї гришки та и очкодовал обидва екипи, а таке судзенє углавним до бавячох уцагнє нервозу, та так було и на тим стретнуцу та мало хибело же би ше на концу бавяче двох екипох, алє и навияче, побили. На концу епилоґ бул червени картони котри достали Душан Бокан зоз Искри и тренер госцуюцей екипи Давор Скендерович.
До конца першенства остало одбавиц ище два кола. На соботу Искра будзе госцовац у Вишнєвцу, а у остатнїм колу до Коцура приходзи остатня пласована екипа Слоґи зоз Остоїчева. Искри нє грожи випадованє зоз лиґи понеже є на 11. месце на таблїчки, на котрим найвироятнєйше и останє по конєц.