КОЦУР – У грекокатолїцкей парохиї у Коцуре по пошвецаню води на швето Богоявлeнє почало и пошвецанє обисцох вирних тей парохиї. Пошвецанє тирвало покля паноцове нє обишли цали валал, односно по конєц януара.
Обисца вирних у Коцуре и того року пошвецали декан бачки и парох коцурски о. Владислав Рац и парох нововербаски о. Данил Задрепко. З богоявлeнску швецену воду паноцове преноша Божи благослов на животни простор, на фамелийни дом и на його членох.
На вецей местох у валалє, як и на огласних таблох коло церкви, бул виложени розпорядок по котрим ше одвивало пошвецанє.
Пошвецанє почало, як и звичайно, од просторийох парохиялного Каритасу „Марийов дом” дзе о. Задрепка дочекали числени волонтере Каритасу, на чолє зоз його координатором Янком Салонтайом. Потим шлїдзело пошвецанє обисцох парoхиянох у цалим валалє.
Того року парох коцурски о. Владислав Рац пошвецал часц валала од Вербасу, а парох нововербаски о. Данил Задрепко пошвецал часц валала од Савиного Села.