БЕРКАСОВО – Пред постом, всоботу, 21. фебруара у Церкви и парохиї Собору святого архангела Михаила отримане стретнуце виронаучних дзецох зоз Шиду, Беркасова и Бикичу вязаних за обичай Пущанє.
Стретнуце почало з молитву односно молебеном до Пречистей Дїви Мариї у беркасовскей церкви хтори служел парох у Шидзе и декан сримски о. Михайло Режак, а одповедал домашнї парох о. Владимир Еделински Миколка.
Потим у виронаучней сали на парохиї о. Еделински отримал кратше виронаучне викладанє о пририхтованю за Вельконоци пост хтори почина нєшка, 23. фебруара.
О. Еделински здогаднул на пририхтованє за пост прейґ Месопусней соботи потим Сиропусней соботи и обичайом Пущанє пред початком посту, а шицко же би ше порихтало духовно з постом и Святу Споведзу и змоцнєли виру и чистого шерца дочекало Вельку ноц.
Обичай провадзи и кладзенє маскох хтори дзеци порихтали и указали з тей нагоди, порихтани и бухти як часц обичая, а дзеци ше потим упознавали и дружели.
