ДЮРДЬОВ – У Рускей школи всоботу, 22. авґуста отворена традицийна тематска вистава „Дакеди було…” а пред тим як почал 23. Фестивал жридлового шпиваня „Най ше нє забудзе”.
На вистави виложени нови часци сталней поставки Одлоги. Слово о портретох трох преднякох свойого часу, о особох котри значни за Руснацох и руску заєднїцу у Дюрдьове. Такой у першей просториї у Рускей школи положени портрети учителя Францискуса Еперта, познатши є як Франц Еперт, потим пароха грекокатолїцкей парохиї о. Дюри Биндаса и треци портрет спотисти, линґвисти, педаґоґа Яши Бакова, а под портретами оквачени и їх биоґрафиї. Попри тим, виложени и нови експонати, а слово о предметох котри хасновал священїк о. Дюра Биндас.
О живоце спомнутих преднякох и їх значносци за Руснацох и руску зєднїцу у Дюрдьове бешедовал коавтор вистави дипл. социолоґ Ваня Дула. Виставу помогли пририхтац историчарка Любица Отич, предситаль Скупштини КУД „Тарас Шевченко” Мирослав Чакан, котри и вельки любитель и почитователь рускей кутури и истириї, як и дюрдьовски парох грекокатолїцкей церкви о. Михаил Холошняй.
Окрем нових експонатох, нащивителє могли опатриц и сталну поставку, котра тематски роздзелєна у просторийох у Одлоги, котра змесцена у Рускей школи.
