Пресудзел други полчас

автор А. Паланчанин
171 Опатрене

ДЮРДЬОВ – На дюрдьовским стадиону ФК „Бачка 1923” победзела ФК „Єдинство” зоз Ґосподїнцох зоз резултатом 3:0 (0:0). Стретнуце судзел судия Куртиши зоз Нового Саду и пре оштре бависко додзелєл по два жовти картони обидвом екипом. У екипи Бачки опомнуца достали Рац и Надьфеї.

Осторожно почало стретнуце прешлей нєдзелї на стадиону у Дюрдьове. Випитовало ше моци на штредку терена и глєдала ше слаба точка у екипох хтора би дала можлївосц же би ше загрожело зоз ґолом. Госцинска екипа добре поставела свою охрану, та домашнїм нє було лєгко пренайсц праву драгу по єденац метери госцох. То було углавним шицко цо було указане на терену у першим полчасу.

Медзитим, у предлуженю ше обставини дакус пременєли. Фодбалере Бачки „уруцели до пиятей швидкосци”, цо допринєсло швидшим акцийом и векшим шансом. На першу ше чекало лєм два минути од початку другого почласу, а стрилєц першого ґолу бул Деянович у 47. минути. То бул ґол хтори ище баржей одшмелєл домашню екипу, вше вецей були на половки терену госцох, та у 77. минути Маркович дава други ґол, а точку на тото стретнуце зоз ґолом у 85. минути положел Д. Тривунович.

За Бачка бавели: Лишич, Д. Тривунович (Д. Топчиов), Зеконя (Маркович), Станкович, Вуйович, Дюрич, Ж. Тривунович (С. Топчиов), С. Тривунович, Роґич, Рац (Надьфеї), Деянович (Деян Тривунович)

У остатнїм колу єшеньскей часци Першенства Бачка путує до Степановичева дзе бави процив домашнєй екипи ФК „Омладинац”. Бачка у тей хвильки на осмим месце зоз 21 бодом.

ПОВЯЗАНИ ТЕКСТИ