КОЦУР – Провадзаци програми тогорочней 46. Културней манифестациї „Коцурска жатва” и стретнуцa младих у Коцуре отримани всоботу пополадню, 11. юлия, у Велькей сали Дома култури.
Початок програми прикрашели дзивчата пооблєкани до народного облєчива котри тримали хлєб упечени зоз нового жита, а предсидатель КУД „Жатва” Микола Ґайдош и предсидатель Националного совиту рускей националней меншини Стеван Самочета го придали предсидательови општини Вербас Миланови Ґлушцови.
По традицийним придаваню хлєба, шлїдзела музична часц дзецинскей програми, у котрей ше зоз танцами и шпиванку представели наймладши члени вецей културно-уметнїцких дружтвох. Так публика уживала у наступох дзецинских фолклорних ансамблох и шпивацких ґрупох насампредз домашнїх Културно-уметнїцкого дружтва „Жатва”, як и у наступох КУД „Тарас Шевченко” зоз Дюрдьова, КПД „Карпати” з Вербасу, ДКЗ „Ґраца Янош” зоз Нового Орахова, РКЦ з Нового Саду, КУД „Иван Котляревски” з Бикич Долу и КУД „Завичайне врело” зоз Коцура.
Дзецинску програму водзела Яна Тимко, а зоз гласним аплаузом наградзена кажда точка наймладших танцошох и шпивачох.
