КОЦУР – Всоботу, 1. новембра, у Римокатолїцкей церкви Шицки святи у Коцуре означени Кирбай, швето Шицких святих. Вельке число римокатолїцких парохиянох того святочного дня нащивели церкву и присуствовали на Кирбайскей служби Божей.
Кирбайска служба Божа почала на 11 годзин, служел ю парох и декан о. Тибор Жунї зоз Србобрану, а сослужели домашнї управитель о. Карло Сабадї котри бул и казательнїк, о. Дєрдь Югас зоз Кули и декан бачки и парох коцурски о. Владислав Рац.
Молитва и шпив присутних вирних у провадзеню орґульох возвелїчали святочносц того швета. Служба Божа служена на мадярским и горватским язику, як то и обичай у коцурскей римокатолїцкей церкви.
На швето Шицких святих вирни и того року на гробох своїх милих покойних на шицких валалских теметовох палєли швички. Понеже тот обичай превжали шицки валалчанє, окрем римокатолїцких парохиянох швички палєли и вирни на гробох покойних на грекокатолїцким и православним теметове.
