РУСКИ КЕРЕСТУР – У нашей парохиї св. оца Миколая у котрей ше по григориянским календаре през наступни викенд будзе означовац швето Рождества Христового, приношиме розпорядок богoслуженьох.
На соботу, 24. децембра, на Вилїю, кед навечериє Рождества Христового, а того дня ше и строго посци, на 8 годзин будзе Служба Василия Велького, а на 23 годзин уж традицийне Всеночне. Того вечара, после посней вечери вирни буду єдни другим глашиц радосну вистку о Рождестве.
Внєдзелю, 25. Децембра, перши дзень Крачуна – Рождества Христового. Служби Божо буду як на швето, на 8 годзин, Архиєрейска на 10 г и вечарша Служба на 17 годзин.
Пондзелок, 26. децембра, на други дзень Крачуна кед ше означує и Собор Богородици и св. Осиф обручнїк, Служби тиж буду як на швето, на 8, 10 и 17 годзин, як и на Циґлашоре на 15 годзин.
Вовторок, 27. децембра, на треци дзень Крачуна, на швето св. Стефана першомученїка, Служби буду на 9, 11:30 и 17 годзин, а на шицких Службох Божих будзе и мированє.
Соботу, 31. децембра после вечаршей Служби будзе и Благодаренє за 2022. рок.
Пририхтуюци ше за Крачунски швета нє забудзме на брата у потреби, котри ма менєй як ми, поручел папа Франциск. На його препоруку порушана гуманитарна акция за дзеци под назву „Часточка твоєй любови зогреє замарзнуте дзецко”. Окрем молитви и жертви за дзеци котри страдаю на України, мож дац и добродзечни прилог до ладички у церкви. И далєй тирва акция „Риба и ризкаша за потребних у нашей парохиї”.