Сход потримовки и у Керестуре и у Кули

автор Рутенпрес
88 Опатрене

РУСКИ КЕРЕСТУР/КУЛА – Жителє Руского Керестура вчера, а дзень пред тим и Кули, по други раз отримали сход потримовки студентом хтори вимагаю виновну и политичну одвичательносц за нєщесце хторе ше случело на Желєзнїцкей станїци у Новим Садзе, кед настрадали 15 особи.

У Руским Керестуре сход орґанизовани вчера на 11:30 годзин опрез будинку школи „Петро Кузмякˮ одкаль ше школяре, наставни кадер и валалчанє рушели ґу центру. Подобно як и прешлого тижня, алє у скоро два раз векшим чишлє, валалчанє зоз порученями виписанима на транспарентох як потримовку студентом, блокирали крижну драгу у Улїци Маршала Тита, а потим зоз 15-минутову цихосцу дали почесц 15 особом хтори настрадали.

Дзень пред тим, штварток, 30. януара тиж вельо масовнєйши сход як прешлираз, отримани и у Кули. Сход отримани опрез Спомин парку од 17:30 годзин.

На сходзе бешедовали доц. др Александер Мудри зоз Оддзелєня за Русинистику Филозофского факултету у Новим Садзе, и штредньошколєц Урош Микулич зоз Бачкей Тополї, вони у своїх мотивуюцих бешедох, медзи иншим, дали потримовку студентом и їх вимогом.

После отриманих бешедох и даскелїх музичних точкох, колона гражданох рушела ґу главней крижней драги улїцох Маршала Тита и Велька Влаховича, при дакедишнєй Робней хижи у Кули, дзе ше у чаше од 19 по 19:15 годзин, дало почесц особом хтори настрадали на Желєзнїцкей станїци.

На сходзе у Кули могло дац и добродзечни прилоги як помоц студентом, а обидва сходи прешли без инцидентох, под надпатрунком полициї.

ПОВЯЗАНИ ТЕКСТИ