РУСКИ КЕРЕСТУР – На вчера вечар, 29. януара отриманей схадзки Управного одбору Рускей матки (РМ), утвердзене же рочна Скупштина того здруженя будзе 24. фебруара, а на схадзки Одбору найвецей точки були пошвецени пририхтованю за тоту подїю.
Медзи иншим то и инициятиви за звекшанє числа маткових Месних одборох дзе по тераз нє були як цо то Дюрдьов и Суботица. Тиж ше на Скупштини планує ожиц роботу других нєактивних одборох и прешириц членство Матки, а тиж и витвориц єдно зоз заключеньох 17. Шветового конґресу, же би ше му могли придружовац и други заинтересовани орґанизациї зоз шицких жемох дзе жию Русини.
На вечаршей схадзки утвердзена и трочлена делеґация Матки котра будзе участвовац на Науковей конференциї у Деви з нагоди Дня Русинох Румуниї. У делеґациї буду предсидатель РМ др Михайло Фейса, секретар Дюра Папуґа як и професор Првослав Янкович, а др Фейса будзе викладац и свою роботу на тему Конфесионални школи.