ДЮРДЬОВ – У парохийним доме, у виронаучней сали при Церкви Рождества Пресвятей Богородици внєдзелю, 9. авґуста после велькей Служби Божей було стретнуце и упознаванє зоз Таню Рибович зоз Ауґзбурґу у Нємецкей.
Присутни ше могли лєпше упознац зоз Таню, котра ше концом дзеведешатих рокох, после законченей осмей класи у дюрдьовскей основней школи, одселєла до Нємецкей ґу родичом. Вона, после законченей штреднєй школи дипломовала на Педаґоґийней академиї и роби як педаґоґиня у институту Боравак „Хорт” у Ауґзбурґу, котри формовани при городу Ауґзбурґ за предлужене пребуванє дзецох после годзинох у школи.
Рибовичова роби з дзецми од першей по штварту класу зоз штирох основних школох з єдней часци Ауґзбурґу, а дзецом у пребуваню заняти помагаю поробиц домашнї задатки, маю рижни тематски роботнї и маю оброк. Понеже у тей часци Нємецкей єст вельо странцох зоз розличних културох, так и у пребуваню дзе Таня роби єст дзеци зоз двацец розличних жемох, та єст и вельо розлични култури и вири.
После того як Таня вибешедовала дзе роби и з якима ситуациями и почежкосцами ше стрета, розвила ше дискусия зоз заключеньом же сущносц чловека остац и буц свой, почитовац свойо, алє и цудзе, помагац и розумиц, бо нє можеме вше знац хто яку терху ноши у своєй „ташки”, гварела Таня. Вона ище додала же нє треба роздумовац неґативно и з предросудками, алє ше треба медзисобно почитовац, бешедовац и розумиц.
Пред розгварку зоз Таню Рибовичову присутних привитал домашнї парох о. Михаил Холошняй, на чию инициятиву и орґанизовани тот сход. Предсидателька Церковного одбору дюрдьовскей грекокатолїцкей церкви Любица Отич подзековала Танї же подзелєла свойо богате искуство и же мала дзеки и сцелосци поприповедац и зоз парохиянами котри були любопитлїви.
На сходзе були присутни парохиянє, як и госци зоз Бечу, о. Борис Холошняй и закончени теолоґ Страхиня Здравкович, котри у дюрдьовскей грекокатолїцкей парохиї на пракси и його супруга Милена, як и Таньов оцец Йоаким Рибович.